பனியும் பனி சார்ந்த இடங்களும்...

பனியும் பனி சார்ந்த இடங்களும்...

பச்சை மரங்கள் வெண்ணிறமாய்
நடந்த பாதை குளிர்பனியாய்
விரிந்த வானம் கார்புகையாய்
விரையும் ஊர்தி வெகுமெதுவாய்!

காணும் முகங்கள் புகைப்படமாய்
அசையும் கரங்கள் சில்லறையாய்
ஓடும் சிறியார் ஓவியமாய்
பாடும் குயில்கள் பெண்மயிலாய்!

கூடும் கூட்டம் ஆழ்கடலாய்
பள்ளிக் கூடம் இறைவிடமாய்
அலுவல் எல்லாம் உறைபனியாய்
ஈசன் கூடத் தனிமரமாய்!

இயற்கை செய்த வெண்புரட்சி
எதிர்ப்பு இல்லாக் காந்திவழி!
எனக்கும் இந்த வரம் கிடைத்தால்
என் பேனா மாற்றும் என்னுலகை!

என் கனவுகள் எல்லாம் காவியமாய்!
என் நினைவுகள் எல்லாம் ஓவியமாய்!
என் வார்த்தைகள் எல்லாம் வாழ்வியலாய்!
நானே நானே இவ்வுலகாய்!

நான்கு நாளாய் வீட்டிலிருந்தேன்!
நன்றாய் உறக்கம் வந்ததம்மா!
திங்கள் இன்று கண்விழித்தேன்!
அய்யோ! நானும் என் சொல்வேன்!!!

தனிமை

உறைந்தது
இயற்கை...

உரைத்தது
தனிமை...

-NewBee

இன்று ஏன் புதிதாய்?

நீ கடிகாரம் தொலைத்த பொழுது
நிமிடத்திற்கு நான்கு முறை
என் பேர் சொல்லி அழைத்து,
நேரம் கேட்டதால்...

புதிதாய் வாங்கிய உன் பெயர் போட்ட கடிகாரத்தை
‘இருக்கட்டும் இது!’ என்று ஒளித்து வைத்தேன்.

உனக்காக;

நீ பசியாய் வந்த பொழுது
தண்ணீர்க்குவளையும் உப்புத்தூவியும்
என் பேர் சொல்லி அழைத்து,
வேண்டும் என்றதால்...

புதிதாய் வாங்கிய உன் பெயர் போட்ட இரண்டையும்
‘காணோமே அது!’ என்று ஒளித்து வைத்தேன்.

உனக்காக;

நீ பிரச்சனையோடு வந்த பொழுது
முழுதாய் ஒரு நிமிடம் பார்ப்பாய்
என் பேர் சொல்லி அழைத்து,
என்முகம் என்பதனால்...

புதிதாய் வந்த இழப்பையும் கண்ணீரையும்
‘சரி போகட்டும் அது!’ என்று ஒளித்து வைத்தேன்.

உனக்காக;

நீ (உன்) தாய் தந்தையோடு வந்த பொழுது
பேச்சுவார்த்தை முற்றிய பிறகும்
என் பேர் சொல்லி அழைத்து,
என்னைத் திட்டாமல் விட்டதனால்...

புதிது புதிதாய், உன் பெயர் போட்டு வந்த சண்டைகளையும்
‘சாவி போட்டே இருக்கட்டும்’ என்று ஒளித்து வைத்தேன்.

உனக்காக;

இப்படி ஒளித்துவைத்து ஒளித்துவைத்து
உன்னைக் காதலித்ததால் தான்
அப்படி என்ன செய்துவிட்டாய் ‘எனக்காக?’, என்று
என் பேர் சொல்லி அழைத்து...

புதிதாய் ஒருவலி தந்தாயே இன்று;
‘அதுவும் இருக்கட்டும்’ என்று ஒளித்து வைக்கவா?

உனக்காக.

ஒலிக்கும்... ...